Sunday, May 18, 2008

نكبة


مرت الذكرى ال 60 للنكبة و انا ما كنت ناوي اكتب شيء الصراحه
يعني واقع أليم و نعيشه كل يوم
قلت في نفسي الفلسطيني الي بعيش داخل فلسطين و لو في الملجأ لا يهتم كثيراً لا بنكبه و لا وكسه و لا نكسه و لا فقسه ولا بشغلات كتير في التاريخ العربي الطويل الزاهر بعد ال 48

غيرت رأيي اليوم

كنت في مكان يتواجد فيه مجلات كثيره على الطاوله

"العوده" عنوان المجله التي اخترتها بصوره المفتاح القديم المميز

بدأت قراءة عناوين سريعه عن اللاجئين الفلسطينيين في كل مكان
البرازيل, الهند, الادرن, لبنان, سوريا, العراق ..... الخ

وضع مأساوي لابعد الحدود
امم متحده لناس و ناس
سفاره فلسطينيه هامله وين ما تروح الله وكيلك
و حلم بالعوده
...


حسبتها في رأسي, مع كل الوضع السيء في غزة الا اننا في نعيم نحسد عليه
ان كنت انا لا اهتم فغيري يهتم وله الحق مثلي في العيش على ارضه
حق مقدس لا يجوز التنازل عنه و الي بده يتنازل عنه اخو شليته مين ما يكون


يا رب انا بحب فلسطين و ما رح افرط في شبر منها

سنعود

Thursday, May 08, 2008

اختناق


مرحبا
طبعاً من يعيش في غزة يعرف ماهية الجو هذة الايام السودا

كاز مغشوش + تربنتينه +زيت قلي مغلي او جديد

و كانه جو غزة مكانش ناقص وسخ و قرف

انا كنت ماشي في الشارع مره انا و ابو العبد زغاليل و شب ثاني صديق, انخنقت من الروائح في الشارع و نزلت على الصيدليه و اشتريت كمامات و اعطيت الشباب وحده وحده

يمكن الناس حكت عني اهبل بس مش مشكله و اذا في واحد دكر كان حكا اشي في وجهي

وين النهفه؟؟؟ اليوم شفت كمان واحد لابس كمامه و ماشي في الشارع

:D

بدينا نتطور و عدنا صرنا زي طهران ولاّ بكين من كتر التلوث ماشيين مكميين

اصبح هناك نوعان من اللثام او التكميم

لثام للمقاومه
و لثام آخر لمقاومة الجو و قهر المعيشه

و في ظل هذه المناسبه اليكم الاغنية التاليه من تأليف عمو الأمور ابو شهاب

عهدير التندر
الي كان شايلنا
من بير النعجه على بورة جميـــــــل
و اتذكرت يا وظحه
و اتذكرت الريحه
و يخرب بيتك يا وظحه على بيت ابوكي على بيت الريحه يا شيخه
ْْْْْْْْْْْْْْْْْ

Sunday, May 04, 2008

مشاهد متفسخة


سندويشة
ابو شهاب: يا حسن و بعدين معك, هي تاني يوم اجي عندك و ما الاقي بوظه سندويش
حسن: مهو يا زلمه فش غاز مشان المصانع تخبز بسكوت للبوظه
...........................

انطمَرت و ضليت طالع
الحمد لله

-------------------------

حوار بين صرمايتين
كونداليزا: اسمعي يا تسيفني, الاستيطان مش كويس عشان خريطة الطريق, بصير الطريق مليان مطبات
تسيفني: اي استيطان؟؟ حد الله اذا كان في اشي زي هيك في بالي يا شيخه
كونداليزا: حد الله عن الشر, قومي تنعمل محشي

-------------------------

بزر مصري
فلان: انا و المدام بنبحبش الا البزر الاسرائيلي, يا زلمه بزر مصر هاظ اشو؟؟ يا لطيف
و الله كل ما باكل حبه اني بسب على حماس, في كل حبه مسبه لولاد ال *@&$#^$@

قال شو يعني حماس هي الي منعت البزر الاسرائيلي و هي الي سمحت في البزر المصري
غيره مش لاقيين الخبز و هو بيتجخرط على نعمة ربنا, اشوف فيك يوم يا شيخ قد ما بكرهك و بكره انتمائك
اصلا في حياتي ما اكلت بزر اسرائيلي!!! طول عمري باكل بزر ابو اسكندر و المحامص في البلد
ماله يعني عاطل ؟؟؟؟؟؟؟؟؟؟؟

Friday, May 02, 2008

فلسفة


و نزلت بقدميها الحافيتين سابحةً في الزنجبيل
العاري الا من الرائحة التي ترسم المكان اللا متناهي في لحظتين بل اقل من لحظتين
غاصت و غاص معها فكر الدياجي و حل فكر الشروق
شروقٌ غربي بلا طعم و لا رائحة مغلقٌ على عالمٍ سما نفسه بالمتحضر
حضارة وهمية في المرآة السحرية فقط
mirror mirror on the wall, who's your daddy??

عكس اعكاس يا عم الحج و خلف خلاف و صور و ابصر شو و الي فهم حاجه من الي كتبه عمو ابو شهاب بدي اعطيه 10 شيكل يروح يجيب علبة ببسي و بسكوت العودة


!!!!!!!!!!!!!!!!!!!!!!!!!!!!!!!!

و بعدين عاد مع الناس الي بتكتب باسلوب صعب ؟؟؟؟؟؟؟
دخيل الله الي خلقكم

طرّوا الوضع شوي